Zawodnej zhromadźiznje w Serbskim instituće

Bautzen / Budyšin, 16. hodownik 2014. W Serbskim instituće (SI) připowědźichu so dźensa na zawodnej zhromadźiznje dalše kroki k přetworjenju jeničkeho zwonkauniwersitneho wědomostneho zarjadnišća. Z tym wotpowěduje institut doporučenjam Wědomostneje rady po ewaluaciji 2012/13.

Anzeige

Dotalnej stejišći instituta w Budyšinje a Choćebuzu so wobchowatej

Sprěnja zjednori so organizaciska struktura SI přez dalšu fuziju wotrjadow: Rěčespytnicy dotalneho Choćebuskeho wotrjada za delnjoserbske slědźenja a dotal w Budyšinje zaměstnjeny rěčespytny wotrjad zjednoća so z 1.1.2015 do noweho rěčespytneho wotrjada z dwěmaj dźěłanišćomaj.

Dotalnej stejišći instituta w Budyšinje a Choćebuzu so wobchowatej, tak zo budźe so tež w přichodźe wo serbskej rěči, stawiznach a kulturje w Hornjej a Delnjej Łužicy slědźić. “Delnjo- a hornjoserbšćina budźetej so tež dale runoprawnje přepytować, wopisować a spěchować”, tak nowy nawoda zhromadneho rěčespytneho wotrjada, dr. Hauke Bartels. Wobaj dotalnej wotrjadaj stej hižo w poslednich lětach wusko kooperowałoj, tak na př. při němsko-delnjoserbskim šulskim słowniku abo při spřistupnjenju digitalneju tekstoweju korpusow w interneće. Dalši přikład je dźěło Budyskich rěcespytnicow na němsko-hornjoserbskim słowniku, kotrež złožuje so na nazhonjenja při wobdźěłanju w Delnjej Łužicy wjele wužiwaneho němsko-delnjoserbskeho online-słownika.

Tež dr. Sonja Wölkowa, wot januara zastupowaca wotrjadnica noweho wotrjada a dale zamołwita za koordinaciju Budyskich slědźenjow wo hornjoserbšćinje, widźi předewšěm šansy w koncentraciji rěčespytneje kompetency w samsnej strukturnej jednotce, kaž bě ju Wědomostna rada doporučiła: “Smy w Budyšinje a Choćebuzu w minjenych dźesać lětach poměrnje samostatnje dźěłali a tuž wšelake nazhonjenja zdobyli, zdźěla smy po wšelakich pućach kročili. Tuž móžemy nětko při zhromadnym dźěle mjez sobu profitować na wužitk postupa sorabistiskeho rěčespyta. To změje z wěstosću tež pozitiwne wuskutki za praktiske spěchowanje rěče.”

Dalša naprawa potrjechi wjednistwo Serbskeho instituta. Dr. Hauke Bartels dósta wot kuratorija instituta nadawk, doporučenja Wědomostneje rady přesadźić, a přewozmje tohodla koncipowanje a zwoprawdźenje dalšich změnow w SI. Zdobom amtěruje wón wot januara 2015 hač do doskónčneho rozsuda wo strukturje institutneho wjednistwa jako direktor instituta. Dotalny direktor, prof. dr. Dietrich Šołta, budźe so hač do swojeho wotchada na wotpočink spočatk lěta 2016 předewšěm swojim slědźenjam wo Jurju Brězanu wěnować.

2012–2013 bě němska Wědomostna rada Serbski institut druhi króć (po lěće 1991 – tehdy jako “Institut za serbski ludospyt”, předchadnika nětčišeho zarjadnišća) ewaluowała. Rěčespytne dźěło w instituće hódnoćeše so při tym připóznawajo: „We wotrjadomaj „Rěčespyt“ (Budyšin) a „Delnjoserbske slědźenja“ (Choćebuz) wukonjane rěčespytne slědźenje je zdawna wuspěšny jadrowy wobłuk instituta. Slědźenja k leksikografiji, přiswojenju rěče a tekstowym korpusam kaž tež na polu dokumentacije a digitalizacije su wažne wuspěchi wunjesli.“ (Wědomostna rada: Stellungnahme zum Sorbischen Institut (SI), Bautzen/Cottbus, Drs. 2998-13, s. 11) [orig. hlej. němska wersija deleka]. Prěnja fuzija dotalneju wotrjadow „Kulturne a socialne stawizny“ a „Empiriske kulturne slědźenje/Ludowěda“ k nowemu wotrjadej „Kulturne wědomosće“ bě so hižo 1.1.2014 realizowała.

Awtor dr. Hauke Bartels je nawoda wotrjada za delnjoserbske slědźenja w Choćebuzu a w přichodźe wotrjadnik noweho rěčespytneho wotrjada Budyšin/Choćebuz, awtorka dr. habil. Sonja Wölkowa je wjednica rěčespytneho wotrjada w Budyšinje a w přichodźe zastupowaca wotrjadnica noweho rěčespytneho wotrjada Budyšin/Choćebuz.

Stichörter Stichwörter
Kommentare Lesermeinungen (0)
Lesermeinungen geben nicht unbedingt die Auffassung der Redaktion, sondern die persönliche Auffassung der Verfasser wieder. Die Redaktion behält sich das Recht zu sinnwahrender Kürzung vor.

Schreiben Sie Ihre Meinung!

Name:
Email:
Betreff:
Kommentar:
 
Informieren Sie mich über andere Lesermeinungen per E-Mail
 
 
 
Weitere Artikel aus dem Ressort Weitere Artikel
  • Quelle: red
  • Erstellt am 16.12.2014 - 11:26Uhr | Zuletzt geändert am 16.12.2014 - 12:12Uhr
  • drucken Seite drucken
Anzeige